by Hayat S Hidayat
waktu kuring datang
manehna mapag ku imut jeung teuteupan
(sampurasun nu di bumi)
(kuring dongkap nohonan jangji kamari)
sore eta bajuna kayas beungeutna pias
sore eta langit bengras lir mapag ucap kaihlas
kembang hebras na jambangan
kembang hate na lamunan
teh manis kareueut na saban teuteup
kembang renda taplak meja
jajantung ngetrokan dada
ucap demi ucap meh paragat na biwir sakarat
demi letah karasa tambah bareurat
(ya, Robbi, jadikeun kuring lalaki)
(jadikeun kuring lalaki)
alhamdulillah
harita kuring balaka sarta harita kuring ditarima
nya manehna wanoja nu mimiti narima cinta
basa kuring mulang
lengkah teh teuing ku hampang
tarate papaes hate
estu ligar na rangkulan
(kleung dengdek buah kopi ruruntuyan)
(kleung dengdek buah kopi raranggeuyan).
Bandung’65.
Respon (1)